اشرا ن ييض ذابركان، ثالّاست ـ ثلا ـ ثقوا

اُو ـ ثاڨوث ثلّأ ثَجْرَس.

لبروق اس ضرغالن ضوّان ايذورار

اَرّعَـض يسّاوال ذي ثــيــزّا؛

آضُو يقوا سَ النوّث يتشاث ذي الباب ن ـ وخّام.

ذڨ اِيض اينين بعد ايلولد آهو اقّاريناسا ـ اَمسيڨل

يرڨد سڨ عديز نْ يمّاس يتّزمومّيڨ! عوضناهي ايضصّ!

هسّيول نانّاس ـ اُوـ ثنَّـا "آولايللّه فو بزّاح آيّا!"

"! ايلول ذڨّ ڨرِّيْوْ ايض ذيس ذابركان لالباس "

اُوـ ثنَّـا ثامعاونت ن ـ ثمقابلت ماتّا آديرڨن سُڨ متشّوك آيا؟

اوسان انّس آذتشّارن سي زوعاب،

" ثامدّورث انّس آتّيلي هتّشور سي ڨرّيوَن !"

 "آراح! " ينّا اوشيبان  

"آقّلت، آث اِيخزّر ذينغ آتّينيذ اِيفهَّم كُلّشي؛

ايضصّ ف الدّونيث عوضناهي يسّن ماتّا آديڨّورن."

وذي الوقّث اينين بعد، رفذن ايطّاوين انّسن

وَ ازرِين يور يجمل

يتحوّاس زنڨ نوسڨّان ن ـ ييض إيخبّل،

هنّض فلّاس لامارث هتلالا.

 ينّاسن اوشيبانM "اسّغذتّ اِي ثوثلايث اينوغ! "

 "آڨرّيو  يوّانغد آمتشّوك آيّا،

امبصّح آذيمنع سڨ ڨرّيو. ايلول ذي ثالّاست،

آغ ـ اَنْـيـَرّا غر ـ اَثفـاوتّْ؛

ايلول ذي الڕعَض وذي ـ اَثڕعضيث، آغ ـ اَندياوي لَهنا

وآغ ـ نيسلّك سي ڨاع ن ـ وا ڨَطّون ـ فلّانغ.

سُڨّاَ اسْلين ثوثلايث آيا بَحرَنْ اوكّلْ.

يرني ينّـا: ’’آنسمّى آمتشّوك آيّا اَمسيڨل "

"خاطراش آديبَيّن ثيغاوسيوين افّرنت؛  "

وآذيَسّن آڨلّان اوهنّسّينشا سيما نلّا

وآغ ـ نيسّنعث آبريذ ن ـ لهنا."

سنّ نيسڨّاسن عدّان، امبعد اثلولد ثامتشّوكث،

ولتماس ن ـ اَمسيڨل، سمّانيت اَثزيزوَتّ،

هلول ذي ثفسوث، ذي النّصاف ن ـ واسّ؛ ثيصطّوا  يسَّـتـشَّـايَـن ايڨينت النوّار،

إيغمّاين اِيزيزاون ن ـ طمڔين ارڨند سي ثمورث

وايطيّارن اتغنّان سي الفرحث ذي ـ اَثرعقاي، ذي  اثْصَطّوَا.

اثفاميلت ثَزْهاَ لاباس،  اُوـ لاكد اِـ يّـا ـ ڨّتواخلقن ڨاع اَزهان،

حمذن ڨاع واڨّ خَلّقَــن اڨّحلان، نتَّـا آڨّلّان يتّنطهلّاي ذيسّن.

آسڨّاس ايعدّا، لامكنّاتي النوّث اوهوثيش.

هيرڨوا اقّورنت، لاكد لبيار؛

يهواد لاڒ يڨڊر ف ثمورث.

اُوذان اتشّاراين ايقصراي ن ـ وامان ن ـ تْسَسّي سي ثعوينت ثبعذ.

الدّراري ايمزيانن اورـ اُوفين آذتّـشَّــن غير ثيخردلين اتّيبستاتين.

يماّثسن هيلّ؛ نهنين اِيلّن.

ذادّثسن يعنا غروفيلاج  آذ يورزي ف ـ لْخَذمث.

زيزيثسن يتغيما كلّ آسّ زدّو ن ـ تسقيفث، ايطّاوين انّس ف  وبريذ  ويتعاساس.

امبعد يسلا ـ س ـ غَرْـ قلي ن ـ تمعشورين

بلّي ثامغارث انّس هسّفالاس الفال اوذيحليش؛

ثطّفيث لڨرينت، يكّر إيهرّس ثامغارثث انّس وايحاوزيت.

ماتّا نوسڨّاس آيّا نْ ـ لميزيرية!

الوقّث اثعدّا، واَمسيڨل ايڨعمر.

يلّا يتّعجاباس الحال آلدا آذ ـ يهوا غر يَغْزَرْ، يتّاقّال ذيس ونتّا يتّازّال.

 "مانيس اتّاسند وامان آيّا؟"  يتصقصا ذڨ مانّس "وْ ماني اتروحان؟"

   ،يولي ف شرا نوعرقوب ويمݒوڒّلْ فْ ـ وَڒڔو ذامُقران

يتّاقّال غرـ اوسڨّان  ذڨ جنّا،

ويتّبحير ذي ڨاع واڨڒرا.

 "امّاغف آجنّا ذازيزا؟ "   يتخمّام،

 وَمّاغف آسڨّان ذاملّال؟ هامين يسعدّاي آسّ يجمل يتخمّام..

 "امّاغف اثفاوتّ ن ـ تفوكث اتّوراغث ذي النّصاف ن ـ واسّ،"

يتصقصا ذڨ مانّس، " وامّاغف اتّازڨّاغث آلدا آتّمسـا؟"

الݚّورث اِيشت يقّيم غر ـ اومسّاي ن ـ تفوكث وايسقصا ايمانّس

 "ماني ثتروحا ثافوكث ذڨ ـ اِيض؟ اَثغݕّڕ زدّو ن ـ تمورث؟

ماني اَثخَسِّي ذي لبحَرْ؟"

وآلدا آديسّجبا يور يتسقصا ذڨ مانّس،

 "مانيس آديوسا يور؟ اُوماتّا ـ آس ـ يتصارن ذڨ آسّ؟

 يتنحشام آلدا آذيفّر ايمانّس هامّا سُڨّا آذيالي واسّ؟

اوْ لاعود ايفَسّي آم وذفل زدّو ن ـ لْحُمَّان ن ـ نتفوكث؟ "

شرا ن ـ واسّ، ـ ذي ـ ثِــيْــزڨِـيْ، يسلا الحسّ ـ ن ـ لهوا جار ن ـ طصطّوَا. (الغابة)

" اورزيتّ وآتّافم، " عوضناهي ذا وشوش، " اورزيتّ آتّافم!"

ثلاثة ن ـ لْخَطراث ونتّا يسّال ذي ثوثلايث آيّا وامبعد ولِّي آكدقلي.

آسّ اينين ايروح ونتّا يبحَر ذي  ثُـوذَرْث  آڨ ـ انّضَن فلّاس.

الدّراري اوثاوين انّس اَتّيعيان آث ـ فهمن،

اوري ـ تّخسشا آذ ـ يمنوغ انّيغ آذيمهايل آم نهنين.

أوريتخسشا آذ ـ ييرار انّيغ آذ ـ يسعدّا الوَقّثْ اَيذسَن.

سقصانيث شرا ن ـ واسّْ.

 ’’آ يَ ـ آمسيڨل، اَمّاغف اُورثتّخسذشا آتّيليذ آم نشنين؟‘‘

 يوعا فلّاسن اُوـ ينّا: ’’خاطراش هقّيمَمْ آمْ ايمسمارن ذي ثشكارث،

" هتنكّاشم ڨاع ذي بعضاكم!"

اُوْ سقصانيث لَخطرث ايشت،

" امّاغف أوشّنّسليش خْلاص هنّيذ آوال ن ـ ربّي ف ييلس انّك؟

"امّاغف يزّمايا الماڔطو  ن ـ وژڔَف باش آذ ـ طرّقغ ايسّ اوزّال؟"

إيواجبيهن.

"لامكنّاتي كنوين، أوديتّاسشا آوال ن ـ ربّي ف ـ ايلساون انّون

غير ما ثخسم آتسّركسم انّيغ آتّيڨم المشاكل."

شرا ن ـ واسّ اقّيمن اتلُوّامن ذيس،

" إيكَر آڨلّان أور ذيتبّاعش ثآصرعوف آث ـ آثيتشّ ووشّن!"

" لامكنّاتي إيكَر آڨلّان أورذيتبّاعش آصرعوف،" يرني ينّا اَمسيڨل،

آذيندجّم آذياف لحشيش ذازيزا وآهنياوي غر المرثَــع يحلان!

إيشت اسّيسن يلّا ذامتشّوك يوعڔ اقّاريناس (ڨيذر).

شرا ن ـ واسّ يقّيم يتمسخير سْ اَمسيڨل، يطّفيث و اَيذوزّيث سْ لڨدڔ.

اَمسيڨل، يوضي ف ـ وّحذير، يجرح لاباس فوضار اَذْ يَخْف انّس.

سُڨّا ازڔين الدّراري اِذامّن،

رَوْلَن وادّجينيث يمݕوزّل  ف ثمورث.

أمبعد ڨيذر ايروح غر وخّام ن ـ اَمسيڨل، واِيعاوذاسن ثيسركاس ف ـ  واڨّضران

"اَمسيڨل   يَــڨرا اِيحذِيرَن ذي البير،" ينّاسن.

"يبزض ف لْباب ن ـ تحانوتّ. اِيفِيّا ثارڨا ذي ثبحيرث."

سُڨا ايروّحد اَمسيڨل غَرْ وَخّام،

 يوشاس زيزيس ثاطريحث سو قبّال.

اول ن ـ اَمسيڨل  آسّ اينين  يتشّوڔ س ـ تتيڔژاڨتّ؛

آذيلي يّزها لوكان ينْغا ڨيذر.

يوقّا الطّرف آمزوارو ن ـ تقصيصت